नगर तालुका (प्रतिनिधी) - एका शेतकऱ्याने आपल्या शेतात ज्वारी आणि मकापिकाच्या मध्यभागी ३० बाय ३० फुट जागेत अफूची लागवड केल्याचा प्रकार नगर तालुका पोलिसांनी तालुक्यातील सारोळा कासार शिवारात शुक्रवारी (दि.७ मार्च) सायंकाळी उघडकीस आणला आहे. पोलिसांनी शेतात लागवड केलेली ४ लाख २७ हजार ५०० रुपये किंमतीची अफूची ४२७५ लहान-मोठी झाडे जप्त करत शेतकरी बबन उर्फ अशोक आसाराम शिर्के (रा.सारोळा कासार, ता.नगर) यास अटक केली आहे.
नगर तालुका पोलिस ठाण्याचे सहाय्यक पोलिस निरीक्षक प्रल्हाद गिते यांना गोपनीय माहिती मिळाली की, सारोळा कासार शिवारात खडकी रोड ते दरेमळा जाणाऱ्या रोडवर असलेल्या एका शेतात शेतकऱ्याने महाराष्ट्रात प्रतिबंधित असलेल्या अफूची (खसखस) लागवड केलेली आहे. ही माहिती मिळताच स.पो.नि. गिते यांनी नगर ग्रामीणचे पोलिस उपअधीक्षक संपतराव भोसले यांना संपर्क करून माहिती सांगितली. भोसले यांनी छापा टाकून कारवाई च्या सूचना दिल्या.
त्या नंतर शुक्रवारी सायंकाळी स.पो.नि. गिते यांच्या सह पो.हे.कॉ.एस.व्ही.खरात, राहुल द्वारके,महिला पो.ना. एम.एन.काळे, चालक स.फौ. दि.बी. घोरपडे, पो.कॉ.आर. आर.शिंदे यांच्या पथकाने दोन सरकारी पंच संजय शिवाजी राहिंज व असिफ जाकीर शेख यांना बोलावून घेत सारोळा कासार शिवारात असलेल्या बबन उर्फ अशोक आसाराम शिर्के याच्या गट नंबर ३१७/४ यामध्ये छापा टाकला तेथे ज्वारी आणि मकाचे पिक दिसून आले. त्यानंतर गोपनीय माहिती नुसार या पिकाच्या मध्यभागी जावून पाहणी केली असता तेथे ३० बाय ३० फुट जागेत अफूची लागवड केल्याचे दिसून आले. पोलिसांनी शेतात लागवड केलेली अफूची ४२७५ लहान-मोठी झाडे त्यास हिरवट, पांढरट लहान मोठी बोंडे असलेली झाडे उपटून त्याचे वजन वजन केले असता ते ५० किलो ३०० ग्रम भरले. त्याची किंमत ४ लाख २७ हजार ५०० रुपये एवढी असून पोलिसांनी तो मुद्देमाल जप्त केला.
याबाबत नगर तालुका पोलीस ठाण्यात पोलिस राहुल द्वारके यांनी दिलेल्या फिर्यादीनुसार बबन उर्फ अशोक आसाराम शिर्के (रा.सारोळा कासार, ता.नगर) याच्याविरुद्ध अंमली पदार्थ प्रतिबंध कायद्यान्वये गुन्हा दाखल करण्यात आला आहे. शिर्के याला अटक करण्यात आली आहे.
Post a Comment