सुपा - नगर पुणे महामार्गावर आतापर्यंत अनेक अपघात झाल्याने मृत्यूचा सापळा बनलेल्या जातेगाव फाटा (ता.पारनेर) परिसरात भरधाव वेगातील कारने दुचाकीला धडक दिल्याने झालेल्या भीषण अपघातात एकाचा मृत्यू झाल्याची घटना २५ ऑगस्ट रोजी रात्री ८ वाजेच्या सुमारास घडली. संजय सोपान ढोरमले (वय ५४, रा. जातेगाव, ता. पारनेर) असे मयताचे नाव आहे.
मयत ढोरमले हे त्यांचे सहकारी गणेश गावडे (रा. म्हसणे) यांच्या सोबत दुचाकीवर सुप्याकडून जातेगाव कडे जात होते, जातेगाव फाटा येथे रस्ता ओलांडत असताना पुण्याहून नगरकडे भरधाव वेगात आलेल्या क्रेटा कारने त्यांच्या दुचाकीला धडक दिली. त्यामुळे दुचाकीवर मागे बसलेले ढोरमले हे दुचाकीवरून उडून रस्त्यावर पडून गंभीर जखमी झाले. त्यांना परिसरातील नागरिकांनी रुग्णवाहिका बोलावून उपचारासाठी नगरच्या खाजगी रुग्णालयात दाखल केले. मात्र तेथे उपचार सुरु असताना त्यांचा मृत्यू झाला. या प्रकरणी सुपा पोलिस ठाण्यात आकस्मात मृत्यूची नोंद करण्यात आली आहे.
Post a Comment