अहिल्यानगर - श्रीगोंदा तालुक्यातील उक्कडगाव येथे जनावरांचा चारा आणण्यासाठी घेऊन गेलेल्या ट्रॅक्टरचा ताबा सुटल्याने ट्रॅक्टर पलटी झाल्यानं ट्रॅक्टरखाली दबलेल्या दोन लहान चिमुकल्यांचा जागीच मृत्यू झाला. ही हृदयद्रावक घटना श्रीगोंदा तालुक्यातील उक्कडगाव येथे बुधवारी दि. 26 नोव्हेंबर रोजी सायंकाळी 6 वाजण्याच्या सुमारास घडली. या घटनेत ट्रॅक्टर चालविणारी मुलांची आई आणि एक लहान मुलगी गंभीर जखमी झाले.
प्राप्ती किरण महाडिक (वय 10 वर्ष) आणि शिवांश किरण महाडिक (वय 4 वर्ष) असं मयत झालेल्या चिमुकल्यांची नावे आहेत. तर कावेरी किरण महाडिक (वय 35) आणि क्रांती किरण महाडिक असं जखमी झालेल्या माय लेकरांची नावे आहेत. याबाबत पोलिसांनी दिलेल्या माहितीनुसार श्रीगोंदा तालुक्यातील उक्कडगाव येथील कावेरी किरण महाडिक या जनावरांचा चारा संपल्याने शेतातून चारा आणण्यासाठी बुधवारी सायंकाळी 6 वाजण्याच्या सुमारास ट्रॅक्टर घेऊन गेल्या. सोबत त्यांची मुले प्राप्ती महाडिक, शिवांश महाडिक आणि क्रांती महाडिक यांना घेऊन गेल्या होत्या.
चारा घेऊन माघारी येत असताना कावेरी महाडिक यांचा ट्रॅक्टरवरील ताबा सुटल्यानं ट्रॅक्टर पलटी झाला. यावेळी पलटी झालेल्या ट्रॅक्टरखाली तीन मुले आणि कावेरी महाडिक दबल्या गेल्या. या अपघातात प्राप्ती महाडिक आणि शिवांश महाडिक यांचा दवाखान्यात घेऊन जात असताना मृत्यू झाला. तर ट्रॅक्टर चालवत असलेल्या कावेरी महाडिक आणि क्रांती महाडिक या दोघी गंभीर जखमी झाल्या. त्यांच्यावर शिरूर येथील खासगी रुग्णालयात उपचार सुरू असल्याचं पोलिसांनी सांगितलं. या घटनेनं उक्कडगाव परिसरात शोककळा पसरली असून सर्वत्र हळहळ व्यक्त होत आहे.
Post a Comment