अहिल्यानगर - एमआयडीसीमधील एक्साइड इंडस्ट्रीज लिमिटेड कंपनीच्या गेटवर कच्चा माल पुरवठा करणाऱ्या वाहन चालकांना दमदाटी करून पैशांची मागणी करणाऱ्या आकाश बबन दंडवते (रा. सावेडी) याच्यासह इतर तीन अनोळखी व्यक्तींविरोधात खंडणीचा गुन्हा एमआयडीसी पोलीस ठाण्यात नोंदवण्यात आला आहे.
या बाबत कंपनीचे एचआर प्रमुख निरंजन नंदकुमार कुलकर्णी (वय ३९, रा. गावडे मळा, अ.नगर, मूळ रा. सासवड, पुणे) यांनी फिर्याद दिली आहे. ६ ऑगस्ट रोजी पुण्यातून पाठवलेले चार टेम्पो कच्चा माल घेऊन एक्साइड कंपनीच्या गेट क्रमांक ३ वर पोहोचले होते. यावेळी आकाश दंडवते व त्याचे तीन साथीदार गेटवर आले आणि त्यांनी टेम्पो चालकांना आत सोडण्यास अडथळा निर्माण करत पैशांची मागणी केली. पैसे न दिल्यास गाडी जाळून टाकू, मारहाण करू अशा धमक्या देण्यात आल्या. कंपनीचे सिक्युरिटी सुपरवायझर विनायक काकडे यांनी हस्तक्षेप केल्यावर त्यांनाही दमदाटी करण्यात आली. वाहन चालकांनी यानंतर गेट नंबर १ द्वारे कंपनीत प्रवेश करत माल उतरवला.
७ ऑगस्ट रोजी सकाळी नाशिकहून आलेल्या कच्चा मालाची पिकअप गाडी कंपनीच्या ३ नंबर गेटवर पोहोचताच, दंडवते व त्याच्या साथीदारांनी पुन्हा एकदा गाडी अडवून पैशांची मागणी केली. चालक संतोष विठ्ठल ठाकरे यांना धमकी देण्यात आली की गाडी आत घेतली, तर ती जाळून टाकली जाईल. चालक भीतीपोटी गाडी नाशिककडे परत घेऊन निघाला. मात्र, दंडवते व त्याच्या टोळीने चारचाकी वाहनाने पाठलाग सुरू केला. चालकाने कंपनीला फोन करून माहिती दिल्यानंतर गाडी देहरे गावाजवळ सापडली व ती कंपनीत आणून कच्चा माल उतरवण्यात आला.
एक्साइड इंडस्ट्रीजच्या पुरवठादारांकडून कंपनीला ईमेलद्वारे आमच्या वाहनचालकांना वारंवार धमकी आणि अडथळ्यांची माहिती दिली गेल्यानंतर कंपनीने तातडीने पोलिस ठाण्यात धाव घेतली. या प्रकरणी आकाश बबन दंडवते व इतर तीन अनोळखी आरोपींविरुद्ध खंडणी, धमकी, अडथळा, गैरकायदेशीर कृत्यांसह इतर गंभीर कलमान्वये गुन्हा दाखल करण्यात आला आहे.
Post a Comment