सोलापूर: लोकनाट्य कला केंद्रात नृत्यांगनांची बैठक लावण्याच्या कारणावरून पंढरपूर तालुक्यातून टेंभुर्णीला आलेल्या तरूणांच्या दोन गटात मंगळवारी रात्री मोठा राडा झाला. बैठक लावण्यावरून त्यांच्यात ईर्षा पेटली आणि त्यातून वादाची ठिणगी पडली. काही वेळानंतर वाद विकोपाला गेला आणि त्यांच्यातील एकाने चक्क गावठी पिस्तूलमधून गोळी झाडली. या गोळीबारात वाखरी (ता. पंढरपूर) येथील देवा बाळु कोठावळे (वय 27, व्यवसाय लॉज) हा तरूण गंभीर जखमी झाला असून त्याच्या डाव्या मांडीत गोळी घुसली आहे.
याप्रकरणी सूरज पवार( रा. पंढरपूर) व त्याच्या तीन अनोळखी मित्रांविरोधात गुन्हा दाखल करण्यात आला आहे. टेंभुर्णी पोलिसांनी तिघांना ताब्यात घेतले असून या घटनेने सोलापूर जिल्ह्यात एकच खळबळ उडाली आहे. टेंभुर्णीपासून पाच किलोमीटर असलेल्या वेणगाव येथील जय मल्हार लोकनाट्य कला केंद्रामध्ये हा राडा झाला आहे.
कलाकेंद्रात एकच बैठक लावली
देवा कोठावळे याच्या फिर्यादीनुसार, मित्र ज्ञानेश्वर बंदपट्टे, वैभव ननवरे आणि सचिन साळुंखे, (रा. पंढरपूर हे वेणेगाव ता. माढा,जि सोलापूर) देवील टेंभुर्णीपासून जवळ असलेल्या पंढरपूर चौकातील जय मल्हार लोकनाट्य कला केंद्रात आले होते. त्याच वेळी संशयित आरोपी सूरज पवार (रा. पंढरपूर) हाही तिथे आला होता. कलाकेंद्रात नृत्याच्या बैठक लावण्यासाठी येथील मालकाकडे मागणी केली असता मालकाने अर्धा तास राहिला म्हणून सांगितले. यावेळी ज्ञानेश्वर बंदपट्टे याने दोन्ही ग्रुपची मिळून एकच बैठक घेतली. एकाच बैठकीतून आपले पैसे वाचतील असे सांगितले आणि नंतर यावरून वादाला सुरुवात झाली.
कमरेला लावलेला गावठी कट्टा काढला अन्....
आरोपी सूरज पवार याला राग आला व तू मला काय भुरटा समजतो काय, पैसे वाचतील असं कसं बोलला म्हणत शिवीगाळ करू लागला. वाद वाढत असताना सर्वजण कला केंद्राच्या पार्किंगकडे गेले. वाद चालूच होता, फिर्यादी देवा कोठावळे हा आला व वाद करू नका म्हणत असताना सूरज पवार याच्यासोबत असलेल्या तिघांपैकी एकाने फिल्मी स्टाईलने आपल्या कंबरेला असलेला गावठी कट्टा काढून कोठावळेच्या पायावर त्यातून गोळी झाडली. या फायरिंगमध्ये एक गोळी त्याच्या डाव्या पायाच्या मांडीमध्ये घुसून जबर जखम झाली.
देवा कोठावळेला ताबडतोब टेंभुर्णी येथील खासगी रुग्णालयात दाखल करण्यात आले. डॉक्टरांनी शस्त्रक्रिया करून गोळी बाहेर काढली असून त्याच्यावर उपचार सुरू आहेत. घटना समजतात टेंभुर्णी पोलीस स्टेशनचे पोलीस निरीक्षक नारायण पवार यांनी घटनास्थळी भेट देऊन तातडीने पाहणी करून पंचनामा करत गुन्हा दाखल करण्याची प्रक्रिया सुरू केली.संशयित आरोपी सूरज पवार आणि त्याचे तीन साथीदार यांच्यावर टेंभुर्णी पोलीस ठाण्यात गुन्हा दाखल करण्यात आला आहे. याप्रकरणी पुढील तपास पीएसआय कुलदीप सोनटक्के करत आहेत.
Post a Comment