राहुरी - भाजपाचे ज्येष्ठ नेते स्वर्गीय आमदार शिवाजीराव कर्डिले यांच्या निधनानंतर जाहीर झालेल्या राहुरी विधानसभा पोटनिवडणुकीसाठी त्यांचे चिरंजीव अक्षय कर्डिले यांनी भाजप पक्षाच्या वतीने सोमवारी (दि.६) दुपारी उमेदवारी अर्ज दाखल केला. यावेळी विधान परिषदेचे सभापती प्रा. राम शिंदे, भाजप प्रदेशाध्यक्ष रवींद्र चव्हाण, पालकमंत्री राधाकृष्ण विखे पाटील, अहिल्यानगर महापालिकेच्या महापौर ज्योतीताई गाडे यांच्यासह हजारो कार्यकर्ते उपस्थित होते.
उमेदवारी अर्ज दाखल करण्यापूर्वी अक्षय कर्डिले यांनी स्वर्गीय आमदार शिवाजीराव कर्डिले यांच्या प्रतिमेचे दर्शन घेतले. यावेळी त्यांच्या आई अलकाताई कर्डिले यांनी औक्षण करून आशीर्वाद दिला. आईची गळाभेट घेताना अक्षय कर्डिले भावूक झाले होते. त्यांच्या आईंचे डोळेही पाणावले होते. हा क्षण उपस्थितांना भावनिक करुन गेला. कार्यकर्त्यांनी शिवाजीराव कर्डिले अमर रहे, अशा घोषणांनी परिसर दुमदुमून टाकला. त्यानंतर मोठ्या संख्येने कार्यकर्त्यांसह जावून अक्षय कर्डिले यांनी आपला उमेदवारी अर्ज दाखल केला. यावेळी आमदार सुरेश धस, आमदार मोनिकाताई राजळे, माजी मंत्री बबनराव पाचपुते, ज्येष्ठ नेते सुभाष पाटील, काशिनाथ लवांडे, अलकाताई कर्डिले, महेंद्र गंधे, संदीप कर्डिले, उदयसिंह पाटील आदींची प्रमुख उपस्थिती होती.
अर्ज दाखल केल्यानंतर अक्षय कर्डिले म्हणाले, राहुरी विधानसभा पोटनिवडणुकीसाठी वडिलांच्या जागेवर उमेदवारी अर्ज दाखल करत आहे. गेल्या तीस-पस्तीस वर्षांपासून वडिलांनी जनतेशी जिव्हाळ्याचे, कौटुंबिक नाते निर्माण केले होते. आज ती संपूर्ण जबाबदारी माझ्यावर आली आहे. माझ्या आयुष्यातील ही पहिली निवडणूक असून वडील माझ्यासोबत नाहीत, ही सर्वात मोठी वेदना आहे. मात्र त्यांचा वारसा पुढे नेत सर्वसामान्य जनतेची सेवा करण्यासाठी रात्रंदिवस काम करणार, असा निर्धार त्यांनी व्यक्त केला.
Post a Comment