अहिल्यानगर - अहिल्यानगर शहराच्या जवळ तपोवन रोड लगत च्या कराळे मळा परिसरात गेल्या काही दिवसांपासून वावर असलेला बिबट्या अखेर २८ नोव्हेंबर रोजी पहाटे चार वाजता पिंजऱ्यात जेरबंद झाला आहे. यामुळे परिसरातील सुटकेचा निःश्वास टाकला आहे. या ठिकाणी २५ नोव्हेंबरला ३ पिल्लं सापडली होती. तेव्हापासून वन विभागाचे पथक या बिबट्याला पकडण्याचा प्रयत्न करत होते. मात्र गेले ३ दिवस तो पिंजऱ्याला हुलकावणी देत होता.
शहरालगतच्या तपोवन रोड परिसरातील कराळे मळ्यात कराळे यांच्या शेतात ऊसतोड सुरू असताना, २५ नोव्हेंबर रोजी दुपारी दीडच्या सुमारास बिबट्याची तीन पिल्ले आढळून आली होती. त्यानंतर तात्पुरती ऊसतोड थांबवण्यात आली.
या घटनेची माहिती मिळताच वनपरीक्षेत्र अधिकारी अविनाश तेलोरे यांच्यासह वन विभागाचे पथक तातडीने घटनास्थळी दाखल झाले. वन विभागाने त्या ठिकाणी पिंजरा लावला आणि ड्रोनद्वारे परिसराची टेहळणी केली. त्या दिवशी रात्री त्या पिंजऱ्यातच ती पिल्ले ठेवण्यात आली होती. पिल्लांच्या ओढीने बिबट्या पिंजऱ्यात अडकेल असा वनविभागाचा कयास होता. मात्र त्या रात्री रात्रभर बिबट्या पिंजऱ्याभोवती घिरट्या घालत होता. परंतु तो पिंजऱ्यात गेला नाही. नंतर पहाटेच्या सुमारास तो ऊसाच्या शेतात निघून गेला. दुसऱ्या दिवशी वनविभागाने पिलांना सुरक्षित स्थळी स्थलांतरित केले. नंतर २ दिवस बिबट्या पिंजऱ्याकडे फिरकला नव्हता. वनविभागाचे पथक ड्रोनद्वारे परिसराची टेहळणी करत बिबट्याच्या हालचालीवर लक्ष ठेवून होते.
३ दिवसांनंतर, २८ नोव्हेंबर रोजी पहाटे चारच्या सुमारास हा मादी बिबट्या पिंजऱ्यात अडकला. रात्री टेहळणी साठी थांबलेल्या पथकाला याची लगेच माहिती मिळाली. सकाळी वनविभागाच्या पथकाने जेरबंद झालेल्या बिबट्यासह पिंजरा तेथून हलवत वन विभागाच्या नर्सरीत नेला. त्यानंतर त्याला जंगलात नेवून सोडण्यात येणार असल्याचे सांगण्यात आले.
जेरबंद झालेला मादी बिबट्या हा २५ नोव्हेंबरला सापडलेल्या ३ पिलांची आईच असावी असा प्राथमिक अंदाज वनविभागाच्या अधिकाऱ्यांनी व्यक्त केला आहे. यावेळी वनपरिक्षेत्र अधिकारी अविनाश तेलोरे, वनपाल नितीन गायकवाड, वन रक्षक अशोक गाडेकर, अर्जुन खेडकर, विजय चेमटे उपस्थित होते. जेरबंद झालेल्या बिबट्याला पाहण्यासाठी नागरिकांनी तेथे गर्दी केली होती.
Post a Comment