शिर्डी - शिर्डीच्या साईबाबांच्या विषयी तेलगु भाषेतील व्हिडीओद्वारे खोटी माहिती पसरवण्यात आली असून संबंधित युट्युब चॅनल असे २७ व्हिडीओ प्रसारित करण्यात आले आहेत. त्यामुळे साई भक्तांच्या धार्मिक भावना दुखावल्या असून या प्रकरणी साई संस्थान च्या फिर्यादी वरून संबंधित युट्युब चॅनल चालविणाऱ्या अजय नावाच्या व्यक्तीवर शिर्डी पोलिस ठाण्यात ५ नोव्हेंबर रोजी गुन्हा दाखल करण्यात आला आहे.
याबाबत साई संस्थानचे अधिकारी रोहिदास अशोक माळी (रा. शिर्डी, ता. राहाता) यांनी शिर्डी पोलिस ठाण्यात फिर्याद दिली आहे. यामध्ये म्हंटले आहे की, तेलगु भाषेतील युट्युब चॅनल Aham brahmasmi यावर ३० ऑक्टोबर पूर्वी श्री साई बाबा यांच्या विषयी आक्षेपार्ह व खोटी माहिती असलेले व्हिडीओ प्रसारित करण्यात आले आहेत. हे तब्बल २७ व्हिडीओ असून त्याद्वारे साईबाबांची बदनामी करण्यात आली. ही हे व्हिडीओ तेलगु भाषिक साई भक्त प्रमोद कुमार चंदा व इतरांच्या निदर्शनास आले.
त्यांनी त्या व्हिडीओ तील तेलगु भाषेतील माहितीचा इंग्रजी भाषेत अनुवाद करून व्हिडीओच्या लिंक व तो मजकूर साई संस्थानला पाठविला. तसेच याबाबत कायदेशीर कारवाई करण्याची मागणी केली. संस्थानने याबाबत तातडीने दखल घेत साई भक्तांच्या धार्मिक भावना दुखावणाऱ्या Aham brahmasmi या तेलगु भाषेतील युट्युब चॅनलचा चालक अजय (पूर्ण नाव, पत्ता माहित नाही) याच्या विरुद्ध शिर्डी पोलिस ठाण्यात फिर्याद दिली. या फिर्यादी वरून पोलिसांनी बीएनएस कलम ३५२, ३५३ (२) प्रमाणे गुन्हा दाखल केला आहे.
Post a Comment