मनमाड : मनमाड नगरपरिषदेच्या निवडणुकीत महायुतीचे उमेदवार असलेल्या रोहन सांगळे यांचे निवडणुकीच्या दिवशी, २ डिसेंबर रोजीच लग्न आहे. त्यामुळे जणू ‘आधी लगीन निवडणुकीचे मग स्वतःचे’ असा मनाशी चंग बांधून निवडणुकीच्या पटलावरील लगीनघाईत हा तरुण सध्या व्यस्त आहे. विशेष म्हणजे निवडणुकीच्या दिवशीच नाशिकला वऱ्हाड घेऊन लग्नाला जावे लागणार आहे. तर लग्नाच्या दुसऱ्या दिवशी मतदार काय आहेर देतात, हेही लक्षणीय ठरेल.
नाशिक जिल्ह्यातील मनमाड येथील बाजार समितीचे माजी सभापती डॉ. संजय सांगळे यांचा एम टेक झालेला मुलगा रोहन आणि नाशिकच्या गिरीश कांगणे यांची आर्किटेक्ट असलेली कन्या अनुष्का यांची लग्नगाठ दोन-तीन महिन्यांपूर्वी बांधली गेली.
राजकीय वारसा असल्याने या तरुणाचे मन राजकारणाच्या क्षेत्रात रुंजी घालत होते. आपण व्यवसायाबरोबरच राजकारणात पण जाणार हे त्याने वागदत्त वधूला अनुष्काला सांगितलं पण होते म्हणे... पण लग्नाची सुपारी फुटली तेव्हा प्रचाराचा नारळ पण लगेच फोडावा लागेल असे रोहनला वाटले नव्हते.
दुपारी वऱ्हाड निघणार
महायुतीची उमेदवारी रोहनला मिळाली, पण लग्नाच्या दिवसाचा मुहूर्त हाच निवडणुकीच्या मतदानाचाही मुहूर्त ठरला. लगीन घटकेच्या अठ्ठेचाळीस तासांपर्यंत प्रचार आणि लग्नाच्या दिवशीच मतदान केंद्र, मतदार यांना सोडून दुपारीच नाशिकला लग्नासाठी नवरदेव वऱ्हाड घेऊन निघणार आहे.
संगीतसंध्या सारखे कार्यक्रम, स्त्री-पुरुष मंडळी प्रचारात गुंतल्याने सरावाअभावी रद्द केल्याचे रोहनचे वडील संजय सांगळे यांनी सांगितले. मात्र निवडणूक प्रचार गोंधळात लग्नाचा जागरण गोंधळ पार पडल्याचे व हळदीचा कार्यक्रम देखील नियोजित असल्याचे त्यांनी सांगितले.
मतदार काय आहेर देणार?
या पार्श्वभूमीवर रोहन व अनुष्काचा विवाह सोहळा संस्मरणीय ठरेल. लग्न लागल्यावर सर्वांचे लक्ष दुसऱ्या दिवशी ३ डिसेंबर रोजी लागणाऱ्या निवडणूक निकालाकडे व मतदारांच्या ‘आहेरा’कडे असेल हे नक्की... अशी ही एका होणाऱ्या लग्नाची चर्चेतील गोष्ट आहे.
Post a Comment