नगर - मोबाईलमध्ये काढलेले अश्लिल फोटो सोशल मीडियावर व्हायरल करण्याची धमकी देत युवतीवर वारंवार अत्याचार केल्याचा प्रकार समोर आला आहे. मुळची पाटोदा (जि. बीड) तालुक्यातील व सध्या शिक्षणासाठी अहिल्यानगर शहरात राहत असलेल्या पीडित युवतीने रविवारी (दि.८) तोफखाना पोलीस ठाण्यात फिर्याद दिली.
पीडितेच्या फिर्यादीवरून अंमळनेर ता. पाटोदा जि. बीड येथे राहणाऱ्या २२ वर्षीय तरूणाविरूध्द गुन्हा दाखल करण्यात आला आहे. गुन्हा दाखल होताच पोलिसांनी आरोपीला अटक केली आहे. सन २०२२ मध्ये फिर्यादीची आरोपीसोबत ओळख झाल्यानंतर ते एकमेकांशी फोनवरून बोलत होते. त्यावेळी ती अल्पवयीन होती. फिर्यादी राहत असलेल्या नगर शहरातील ठिकाणी येऊन आरोपीने तिच्याशी शारीरिक संबंध केले होते. त्यावेळी त्याने अश्लील फोटोही त्याच्या मोबाईलमध्ये काढले होते. दरम्यान, सदरचा प्रकार फिर्यादीच्या आई- वडिलांना समजल्यानंतर त्यांनी आरोपीच्या घरी जावून त्याला त्याच्या आई-वडिलांसमक्ष समजावून सांगितले होते.
त्यानंतर दि.६ ऑक्टोबर २०२४ रोजी फिर्यादी तिच्या नगरमधील राहत असलेल्या ठिकाणी असताना आरोपी तेथे आला. त्याने त्याच्या मोबाईलमध्ये फिर्यादीसोबतचे अश्लिल फोटो व व्हिडीओ तीला दाखविले व ते व्हायरल करण्याची धमकी देत बळजबरीने शारिरीक संबंध केले. दि.१४ ऑक्टोबर २०२४ रोजी सायंकाळी फिर्यादी एका मुलासोबत कॉलेजवरून घरी दुचाकीवर येत असताना आरोपीने फिर्यादीच्या बहिणीला व्हिडीओ कॉल करून दुसर्‍या मुलासोबत फिरत असल्याचे दाखवून बदनामी केली. फिर्यादीच्या वडिलांना मेसेज करून फिर्यादीची बदनामी केली. या सर्व प्रकारानंतर पीडिताने रविवारी तोफखाना पोलिसांना माहिती दिली. पोलिसांनी आरोपी विरोधात गुन्हा दाखल करत त्याला अटक केली आहे.
Post a Comment