केडगाव बायपासला सुरु होता भलताच 'कुटाणा', ‘एलसीबी’ च्या छाप्यात ४१.२६ लाखांचे घबाड जप्त

अहिल्यानगर - गॅसच्या टँकर मधुन व्यावसायिक टाक्यांमध्ये बेकायदेशीरपणे गॅस रिफीलिंग करणारी टोळी स्थानिक गुन्हे शाखेच्या पथकाने पकडली आहे. या टोळीकडून ४१ लाख २६ हजारांचा मुद्देमाल जप्त करण्यात आला आहे. केडगाव बायपास रोडलगत असलेल्या अनुराज टायर या गोडऊन मध्ये ७ डिसेंबरला सायंकाळी ही कारवाई करण्यात आली.    

स्थानिक गुन्हे शाखेचे पो.नि.किरणकुमार कबाडी याबाबतची गोपनीय माहिती मिळाली होती. त्यानुसार त्यांनी स्थानिक गुन्हे शाखेतील पोलीस अधिकारी हरिष भोये, अनंत सालुगडे व  पोलीस अंमलदार लक्ष्मण खोकले, ह्रदय घोडके, दिपक घाटकर, बिरप्पा करमल, राहुल द्वारके, शामसुंदर जाधव, भिमराज खर्से, राहुल डोके, बाळासाहेब नागरगोजे, सोमनाथ झांबरे, सतिष भवर, योगेश कर्डिले, प्रमोद जाधव, प्रशांत राठोड, चालक अर्जुन बडे, भगवान धुळे, अरुण मोरे अशांचे पथक कारवाई साठी पाठविले.

या पथकाने तेथे जावून छापा टाकत बेकायदेशीरपणे गॅस रिफीलिंग करत असलेल्या कृष्णा मधुकर दहिफळे (वय ३०, रा. कोळवाडी, ता.अहमदपुर, जि. लातुर), आदित्य सुनिल पवार वय (वय २१,रा. बीबी ता.लोणार जि. बुलढाणा, हल्ली रा. निल हॉटेल, केडगांव), विश्वास त्रिंबक शिंदे (वय ५१, रा. केडगांव), जनातुल शेख (वय १९, रा. चापरा, जि.नदीया, पश्चिम बंगाल, हल्ली रा.निल हॉटेल, केडगांव) यांना ताब्यात घेतले. त्यातील विश्वास शिंदे यास गोडाऊनचे मालकाबाबत विचारपुस करता सदर गोडऊनचे मालक राजु साबळे (रा. केडगांव)(फरार) असे असल्याचे सांगितले.

 ताब्यातील इसमांना ते रिफिलींग करित असलेल्या कामाबाबत परवाना आहे काय? याबाबत विचारपुस करता त्यांनी आमच्याकडे कोणत्याही प्रकारचे परवाना नसल्याचे सांगुन, स्वतःचे आर्थिक फायद्या करीता एच.पी गॅस टॅकरमधुन जुगाड करुन व्यवसायीक गॅस टाक्यमामध्ये भरत असल्याचे सांगितले. 

पथकाने या ठिकाणाहून ८ लाख ३६ हजार ३३९ रुपये किंमतीचा एच.पी. कंपनीचा १७ टन गॅस, ३० लाख रुपये किंमतीचा टँकर, ६० हजार रुपये किमतीच्या भारत गॅस कंपनीच्या २० रिकाम्या गॅस टाक्या, २२ हजार ५०० रुपये किमतीच्या भारत  गॅस कंपनीच्या ५ भरलेल्या गॅस टाक्या, २ लाख रुपये किमतीचा एक छोटा हत्ती टेम्पो ,५०० रुपये किमतीचा एक अडजेस्टेबल लोखंडी पान्हा, ५ हजार रुपये किमतीचा एक इलेक्ट्रॉनिक वजनकाटा, २ हजार रुपये किमतीचे गॅस भरण्यासाठी वापले जाणारे पाच पाईप असलेले नोजल असा एकुण ४१ लाख २६ हजार ३३९ रुपये किमतीची मुद्देमाल ताब्यात घेतला आहे.

या आरोपींच्या विरुद्ध कोतवाली पोलिस ठाण्यात भारतीय न्याय संहिता कलम २८७, २८८ सह जीवनावश्यक वस्तु कायदा १९५५ चे कलम ३, ७, एल पी जी (पुरवठा आणि वितरण नियमन) आदेश २००० चे कलम ३(२)(ब), गॅस सिलेंडर अधिनियम २०१६ चे कलम ४३, ४५, ४६, सह स्फोटके अधिनियम १८८४ चे कलम ९ (ब) नुसार गुन्हा दाखल करण्यात आला आहे.